Oschtermändig 12. April 2004

Sächsi am Morge (füech). Zwe ungernämigsluschtig Schiklübler ( Michael Siegenthaler u Klaus Zaugg ) hei uf ene dritte settige ( Peter Rötlisberger ) bir Linge z’Wichtrach gwartet.
Planet isch d’Treningstour uf d’Alt Bigle Märe im Gantrischgebiet gsi. Lut Informazione vom Tureleiter, Peter Rötlisberger, isch das ä Tour vo öppe 2 ½ bis 3 Schtung Ufstig uf 2’249MüM.

Öpe a Viertustung speter, si mer komplett gsi, hei am Peter sis Outo belade u si los gfahre. Wo mer i Richtig Gantrisch hei gluegt, het’s üs doch ä chli Angscht gmacht. Di Höger si aui vore schwarze Wulche bedeckt gsi u äs het gar nid nach türele usgseh. Speter, mer si scho am Gurnigelbad verbi gsi, isch es noh schlimmer worde. D’Schtrass isch schneebedeckt gsi u äs het usem Näel use gniselet. Mir si aber glich witergfahre. Öppe uf dr Höchi Schwäfelbärgbad simer zum Näbel usecho u hei a wuderschöni schnapsklari Ussicht uf’d Gipfle gha. Die hei wunderschön rot i de erschte Sunnestrahle glüchtet. Da het üses Härz höcher afa schlaa. Ir Hängscht Kurve heimer ds Outo parkiert u d’Schii agschnaut.

Mit gmüetlechem Schritttämpo simer los - Richtig Gipfu. Scho gli heimer gmerkt, dass d’Abfahrt de äuä asträngend wird si. Wime liecht het chönne erkenne, hetts links u rächts vor Ufstigsspur Bruchharscht gha. Aber o das het a ächte Schiklübler nid ab vom witerloufe! Nach 1 ½ Stung simer zure Hütte cho, womer gäbig ufem Bänkli hei chönne z’Nüni näh.
Der Hütewart het üs no chli über z’Wätter vo de letschte paar Tag verzeut u wie viu Schnee das äs het gä i dere Zyt.
Nachem Znüni si mer früsch gsterkt witer Richtig Gipfu. Der Bruchharscht isch immer wie schlimmer worde. Scho jetz heimer weichi Chnöi übercho wemer he ads achä fahre däicht.

Nach öppe ¾ Stung simer du ufem Gipfu acho u hei die troumhafti Usicht uf ds Panorama u ds Näbelmeer gnosse. Natürlech hei mer o mitemnä Schluck feine Wisse u Rote Wy uf üsi Leischtig agschtosse.

Nachdäm das mer üsi Seele mit dene Idrück hei vou tanket gha hei mer üs a d’Abfahrt gmacht. Mit meh gumpe aus schifahre si mer wieder zrugg Rrichtig Outo.

Natürlech hei mer wägem Bruchhascht äs paarmau Ganzkörperkontakt mit em Schnee gmacht aber o das cha ä richtige Schiklübler überhoupt nid schocke.

Ganz, gsung, zfriede u o ä chli müed si mer bim Outo acho u hei üser sibe Sache wieder iglade.

Düre Näbel u über schneebedeckti Schtrasse si mer wieder vom super schöne Wätter zrügg uf Wichtrach gfahre. Natürlech hei mer ir Linge üsi Tour no mitemnä Bier begosse u aui sie wieder i verschideni Richtige hei zue.

Klaus Zaugg